Анай кыллэн нуналэзлы сӥзьыса

2000-тӥ арысен 21 феврале быдэс дунне ортчытэ Анай кыллэсь нуналзэ. Солэн шорсюлмыз луэ калык лулчеберетлы но кылтӥрлыклы юрттэт сётон, котькуд кыллэсь чеберзэ но кулэлыксэ возьматон.

Глазовысь шаертодонъя музей итӥське та быдӟым тодметлы но сӥзе возьматонзэ дано удмурт кылбурчимылэн Ф. Васильевлэн творчествоезлы.

Солэсь 85 арессэ пусйыса (вордӥськемын 1934-тӥ аре 19 кионсюантолэзе) но анай кыллэсь данзэ ӝутыса, музей ӵектэ Флор Ивановичлэн книгаосыныз, синпуктэмъёсыныз но мукет пӧртэм тӥрлыкъёсыныз тодматскыны.  Нош нырысь ик – солэн анай кыллы сӥзем кылбурез (вакытаз вераломы на, – кылбур кыл малпамын но ӵектэмын Ф. Васильевен).
 
Кинлы кулэ на, пе, удмурт кылэд?!
Гуртад сяна,
Уд вераськы соин.
Сыӵе вераськонэз ке кылüсько,
Котьку солы туж лек вожпотüсько.
 
Анай кыл – улонэ нырысь вамыш,
Сотэк уд лэсьты мукетсэ вамыш.
Анай музэн,
Анай кылыд юрттоз,
Улон сюрес кузя йыгмыт валтоз.
 
Бадӟым шуръёс кошко ошмесысен,
Нош вераськон кутске
Анай кылэн.
Умой öд ке вала анай кылэз,
Ӟечгес уд тоды тон мукет кылэз.
 
Соин ик мон
Тыныд йыбырттüсько,
Соин ик мон
Тонэн данъяськисько!
 
Лыдӟыку та чуръёс туж но туж сюлме бинисько, мур малпаськыто.
Малы меда?

Угось, соос зэм ик верало анай кыллэн данэз но кулэлыкез сярысь. Кӧкыысен тодмо кыл, кудӥныз анай пиналзэ лэйкатэ, йырвизьмаз но сюлэмаз асвалан но адямилык кылдытэ. Озьы нылпи валаны кутске ас котырзэ, дуннелэсь бергамзэ, шунды но толэзь пиштэмез. Я, ваньзэ вераны но шуг, кыӵе бадӟым кужымез Анай кыллэн. Шонерзэ ке верано, адямилэн но калыклэн сямзы ик кылдэ кылысен, малы ке-а та кылъёс однокоренной луо. Кызьы шуэмым Библиын: «Нырысь кылдӥз Кыл. Кылыз луиз Инмарлэн. Кыл луиз Инмар» («В начале было Слово. Слово было у Бога. Слово было Бог»).
Ф.И. Васильев кылбурчимылы луыса, асьмеос мусо Удмурт кылмылэсь кужымзэ шонергес валаны кутскиськом но Дуннэ вылэ вӧлдӥськом. Тау солы!