«Мон понна эн бöрдэ юн» (Быдӟым ожысь солдатлэн гожтэтъёсыз)

75 ар ини синчеберзэ кадь утьыса возе Людмила Борисовна Шмыгина атаезлэсь войнаысен келям гожтэтъёссэ. Кыӵе сюресъёсты но ӧз ортчы Князев солдат. 1941-тü арын 27-тü июльысен кутскыса 1945-тü арлэн 3-тü январёзяз со каргам фашистъёсын ожмаськиз, Родинамес утиз. Удмуртиысен Казахстанэ вуиз, отысен Москва улосэ келязы. Каргам сьӧсьёслэсь Украинаез, Бессарабиез (Молдавия), Румыниез, Венгриез мозмытüз. Нош гумырез Венгриысь Будапешт кар урдэскын Кабанье гурт пумын быриз. Отын сое берпуметüез пуля шедьтüз. 

Борис Иванович Князев 12 июле 1915 арын Глазов уездысь Умск гуртын (пыре Глазов ёросэ) вордüськемын. Кооперативной техникумын дышетскем егит воргорон вордскем палъёсаз ик сельсоветын бухгалтер луыса ужаз. Кык ар (1936–1938) Горд армиын действительнойын служить кариз. Бертэм бераз Глазов нефтебазалэн директорезлэн воштüсез луиз. Нош улон шудэз (шонерзэ вераса, странамылэн шудтэм шудэз улсын) Князевез нош ик ож сюрес вылэ поттüз. 

Действительнойын но, войнаысен но со туж ӵем семьяезлы гожтылüз. Туннэ дырлы 45 гожтэтэз кылемын. Али соос Глазовысь шаертодон музейын утисько, ӵем дыръя пӧртэм адӟытонъёсын но ужрадъёсын кутüсько. Гожтэтъёсысьтыз валаны луэ Борис Князев шуг-секытъёс пыр геройлыко луыса потэмын, пленэ шедьылыса но ӧвӧл чигтüськемын, кунмес гажанэз ӧвӧл быремын. Тросаз гожтэтъёсаз патриотизм мылкыдыз пачылмыса потэ. Соин сэрен ик коммунист луыны партячейкае куриськон но гожтüз вал.

Тросэз гожтэтъёсыз ӟуч кылын гожтэмын, нош отын ик сюлэмшугзэ анай кылыныз кисьтэ. Ӧз кылды Князев Борис Иванович лейтенантлы дораз вуыны. Гожтэтъёсын но удмурт кылыныз гинэ буйгатылüз бӧрдüсь сюлэмзэ. Анай кылызлы лейтенант туж оскиз. Анай кыл уга самой секыт вакытъёсы юрттэ, кужым сётэ, азьлань валтэ. Тüни со удморт малпанъёссэ но чуръёссэ лыдӟисьёсмылы возьматомы георойлыко Борис Иванович Князевлэн вордскем дырысеныз 105 ар тырмонлы, Быдӟым Вормонлы 75 ар тырмонлы но дуно Анай кылмылы сüзьыса.
  
Гожтэтъёсыз возьмато, кыӵе зол мӧзмüз яратоно Люба кышноезлэсь, анаезлэсь, еще ке мусо нылпиосызлэсь – Женя пиезлэсь но Люда нылызлэсь. Али гинэ школае мынэм пизэ индылüз ӟеч дышетскыны но анаезлы юрттыны, куддыр исаса Евгений Борисович шуыса вазьылüз. Нош пичи нылзэ гожтэтаз нималляз «кукла», сыӵе чебер, мусо, яратоно потылüз, вылды, вордэм нылыз.

«Кукла» нылыз Люда.

Нош тани таяз туспуктэме семьяез пуксем 1949-тӥ арын, атайзылэн быремез дырысен 4 ар ортчыса. Зэм ик, туж чебересь, таза, йӧно, муспотон удмурт пиналъёс.

Б.И. Князевлэн семьяез 1949-тӥ арын. Паллянысен буре – кышноез Любовь Гавриловна, пиез Женя, нылыз Люда.

Кызьы вылды таӵе нылпиослэсь уд мӧзмы, кызьы вешам уз поты соосты. Князев лейтенант ӵошен служба нуись юлтошъёсызлы но гуртысьтыз вуэм фотоосын ушъяськылüз. Угось куд-ог гожтэтъёсаз кышноез Любовь Гавриловна семьяезлэсь фотооссэс но келялляз. Ачиз но воргорон быгатэмезъя ыстылüз аслэсьтыз яке юлтошъёсыныз туспуктэмъёссэ. Валамон ини, сыӵе луонлык кылдüз Европаын: Румыниын но Венгриын. Тани одüгаз, 1944-тӥ арын 15-тӥ феврале туспуктэмаз, со мур малпаськись синъёсын учке  кыдёкысь семьяез шоры но гожтэ: «Люба! Дорогие детки. Муж и папка вас никогда не забывает».

Борис Иванович Князев. 1944-тӥ ар.

Котькуд гожтэмаз буйгатылüз гуртооссэ: «Мон понна эн бöрдэ туж юн. Мон каль улüсько умой. Гуртэ бертыны но адскыны коть куриськы, коть эн, – всеравно уз лэзелэ. Шат ранить ке кариськи, соку можот гуртэ еще быгато ветлыны. Мон туж трос всякой адӟи ни кык ар но ӝыны куспын, и малпасько мон шудо шуса, а может тüляд шудды монэ возьма. Улэлэ тü ӟеч, куспады эн куаретэ, утелэ пиналъёсты и вителэ милеместы. Ӝоген тушмонэз вормом и соку не одüг-ог нуналлы, а прочсэ бертом гуртэ». Озьы гуртооссэ оскытыны выриз но капчи мылкыд соослы сüзьылüз солдат Быдӟым ож бусыысь, кытын нунал но ӧз ортчылы калык быремлэсь. Ранить каремзэ но ватылüз семьяезлэсь, «мон каль улüсько номыре ӧвӧл, только ӧжыт виси, но со ортчоз», – гожтылüз. Огпол дораз ик бомба пуштэм бере ожмурт кылэмысь дугдӥз, пельыз вияз, висиз. Сое но гуртоосыз берло гинэ тодӥзы. Пленэ шедьылэмзэ но кема ватыса возиз, семьязэ жаляз.

46-тü гожтэтаз (Румыния, 12.07.1944) со нош гожтэ: «...муми медаз курекъяськы, ӝоген война дугдоз ни, бертом гуртэ. Только тü гинэ ӟеч улэ. Йыры ке пельпум вылам кылиз, кӧт йылам но гуртэ турско бертыны. Тü гинэ вителэ, да эн вунэтэ, гожтэт ӵем гожъялэ. Ми толэзь котыр жугиськон дорысь палэнын каль улüськом, кытсы куштозы жугиськыны, тодыны уг луы. Кык арняскын куинь ар тырмоз ини гуртысь потэм, так туж бертэм потэ, но нокызьы уг луы. Луло ке кыли, конечно, куке-соку ваньмыз вуноз. А каль секыт, туж секыт».

Гожтэтъёсаз солдат «няньтэк пукиськоды-а» шуыса сюлмаське, «кызьы ке но кыстüське ни выль нянезь, можот луоз дунтэм, можот колхозын сётозы». 

54-тü гожтэтэз (Румыния, 16.08.1944) быдэс удмурт кылын келямын анаезлы но нылпиосызлы. Борис Иванович нош сюлэмзэ кисьтэ: «Туж мӧзмыт улыны. Тüлесьтыд но туж мӧзми ни. Адскем потэ. Мон бертü ке, тüледэсты одüгдэс но уг ни дыр тодма. Одüгез туж мӧйымоз (анаез сярысь – В. Л.), а Женяен Людаен будозы зӧкесь». 

Анай кылыныз гинэ кӧт ӝожзэ кисьтыны быгатылüз, мискинь. Куддыр таӵе чуръёс но кисьтüськылüзы: «Нокызьы но гуртэ бертыны уг луы. Кин ке зӧк начальникъёслы матын ке, соос кошкыло адскыны, но ми пичи калык чидалом ни видимо еще кӧня ке ар гуртэ бертытэк. Но ничего, луло гинэ мед кылём, соку бертом ни». Вот озьы …  

55-тü гожтэтаз (20.08.1944) нош удмурт кылыныз вазиське Любаезлы: «Эн сюлмаськы, тиляд шудады, мон чакласько, мыным номыре уз луы. Мон пыр малпасько только гуртэ бертон сярысь. Ку меда со дыр вуоз, да вуоз-а меда, уз-а».

Егит воргоронлэн туж мусояськемез потэ гажанэныз, сое гожтэт чуръёсысь валаны луэ: «Как же можно вас забывать? Когда за последнее время ты из головы моей не выходишь денно и нощно. Прошлую ночь буквально всю ночь ты мне снилась». Сюлмысь потэм лушкем малпанъёссэ со удмурт кылыныз ик гожтэ: «Эх, Люба, Люба, дорогая, малы тон ӧвӧл бордам, тон ке луысал, мон сокем ӧй чакласал, кыӵе тонэ хоть одüг пол чуп кароно на вал». 

Музъемозь йыбырттом дуно анай кылмылы удмурт солдатэз ньыль ар но ӝыны шимес ожъёсын утемез понна!

Кабанье шайвылысь 140 нимтэм советской солдатъёслы синпелет.
Нимтэм советской солдатъёслэн синпелетэз дорын Б. И. Князевлы пуктэм синпелет.