Удмурт кыллэн зарни тысьёсыз (Золотые зерна удмуртского языка)

Син чеберез, зарни тысез кадь утёно но со дыре ик калык вылэ паськыт вӧлмытоно удмурт кылмылэсь вашкала синпельметъёссэ. Уго соос туж яркыт кыллэсь чеберзэ но адямилэсь инмар дуннезэ возьмато.

Сыӵе синпельмет радэ пыртыны луэ Н.Г. Первухинэн XIXдаурын гожтэм чуръёсты. Глазов уездын улӥсь удмуртъёслэсь со гожъяз вал пӧртэм вӧсяськон сям-йылолъёсын герӟаськем куриськонъёссэс. «Эскизы преданий и быта инородцев Глазовского уезда. Эскиз III. Следы языческой древности в образцах устной народной поэзии вотяков» нимаса, соос 1888 арын Ваткакарын 85 бамъем книгаен поттэмын.

Чупчи выл гуртъёсын Дурга, Чабъя, Ӝикъя, Ӟумъя, Куака, Кушъя, Чола, Бигра, Узя, Удья воршудэ пырись муртъёслэсь люкамын та чуръёс. Первухин этнограф возьматэ, таӵе вӧсяськон нергеосы, пе, туж трос гуртъёсысь калык лыктылӥз. Огинэ люкаськем муртъёс тыршылӥзы кусыпсэс юнматыны. Юнме-а тазьы шуылӥзы: «Ӟеч бускелен, ӟеч семьяен султӥм-пуксим, одӥг кылысь-ымысь карыськыса лыктӥм». «Кызь родняё-выжыё мед луомы, Чупчи йылысен Чупчи пумозь роднямы мед луоз, узьы урдсы узьы пуксьымон мед ло, кали урдсы кали пуксьымон мед ло».

Куриськонъёс возьмато, кызьы но мар синмын учкылӥз удмурт калык улон шоры, кызьы валалляз югыт дуннеын ас интызэ, мар но кыӵе кылъёсын вазиськылӥз аслаз инмаръёсызлы, кудъёссэ пумтэм гажалляз, кудъёсызлы туж мур оскылӥз. Соин ик та куронъёсын адями, инмаръёсын ӵошатыса, пичи луэмзэ возьматыса, вералляз: «Осто, Инмаре! Ми пинал калык, вождэс эн поттэ. Милесьтым кабыл басьтэ. Асьтэ пала каре», яке тазьы: «Ми, пинал калык, бöрысь веранозэ валлён вераськом, ачид тупат, Инмаре, Кылдысинэ, Куазе, Чабъя воршудэ, Ӝикъя воршудэ! Ми, пинал калык, данак вераны-шуыны ум тодске, куинь кыл ке верам, мусо кар, ӟаным кар!»

Али учкыса, валаны луэ, куинь ёзо-люкето соос вылэм шуыса. Ӵошен (семья муртъёсын-а, гурт калыкен-а) вӧсяськыны кутскыса, нырысь-валысь ик чирдыкуз тӧро яке «удмурт поп» (озьы но шуылӥзы ми палан) тазьы валэктылӥз огъя люкаськемлэсь мугзэ: «Остэ Инмаре, Кылдысинэ, Куазе, Дурга воршудэ! Тулыс дыр вуиз! Потӥмы ми луд вылэ, куинь пол берло-вальло ветлӥмы, куинь тысь кизимы». 

Кыкетӥ люкетаз одно ик вералляз, кыӵе куронъёсын адями вазиське вылӥ инмаръёсызлы: «Даскык выжыем мед выжыялоз, куатьтон куроем мед пушъёз <…> азвесь шепъем, зарни тысьем, син тырмымон, ки бырттымон. Куинь пол вандыса кырым тырмымон мед луоз!» Яке нош: «Сюрс сю мед луоз! Паськыт мед выжыялоз, куроез бадь ньöр кадь мед луоз, кыз кули кадь шепез мед луоз, азвесь бирды кадь тысез мед луоз, тырос обиньысь мед шедёз! Сюрлоен ке мынӥмы, культо урдсы культо мед пуксёз, юсись борды юсись мед султоз! Кабанэ ке ворттӥмы, кабан урдсы кабан мед лэсьтомы!». Таӵе кылъёс борды ватсаллязы на, кызьы но кинлэсь-малэсь утьыны кулэ кизем бусыез: «Эн сёт изъянтыны номырлы, шырлы, чибиньёслы. Шуныт уйеныд, уй чилекъяськеменыд, шуныт-небыт зореныд, мылкыд-секыт гудыриеныд возьма». Юзэ обине но кенос улэ пыртытозь кылыныз сюрес возьматылӥз вӧсяськись мурт инмарезлы таӵе кылъёсын: «Обинь улэ шуныт понэм бере ӟеч куасьты». «Культоез шиньыр вылэ вöлдэм бере (остэ, шуыса) шуккиськем кутэсэн тысез данак мед усёз шуыса. Зарни кадь, азвесь кадь мед луоз тысез. Курозэ палэнтэм бере, вороке люкам, азвесь лопатаен пальткем бере, зарни тысь мед усёз. Дöдьыен ке мынӥм шынир доре, пудовкаен тырымон мед луоз. Улласянь понӥм ке сюсеге, валлапалкиз потымон мед луоз. Со сюсегысь юэз басьтӥм ке, (кобыен но, дурыен но, мучкоен но) синэмез медаз шöдскы». Ю-нянь сярысь гинэ ӧвӧл куронзы: «Гидысь животэз ке лэзимы люктаны, огпал пумыз гидын мед луоз, огпал динь пумыз люкмес дорын мед луоз», шуозы вылэм. Яке эшшо тазьы но: «Мед луоз азвесь гидъёсмы, куамы но кенермы, забормы но гидкуа котыртӥмы»,«Сёт милем азвесьтэ, милям мед луоз тусьтымы, пуньымы, ӝöкмы, пуконмы, ӟусмы, кроватьмы но мед луоз азвесь». 

Нош куронлэн куинетӥ люкетаз самой кужмо кылъёс вераллязы ини. Со луиз вӧсяськонлэн шорсюлмыз. Йылолэ люкаськем калыклэн нимыныз: «Йыбырттэм кымысмы Инмар понна, пидсам пидэсмы калыклы. Кизем юмы вань калыклы мед тырмоз, капчи мед кароз», шуыса, «азвесь пиньем, зарни гонъем ошпи» вандылӥзы, пӧзьтылӥзы но вань калыкен ӵош сиылӥзы. Яке тазьы вазиськылӥзы на: «Учкы, Инмаре, вылысен пиналъёсыд вылэ ӟеч синмыныд! Ӟеч кидыс пазьгон дырья сӥзем тагапидэ сётӥськом ни! Тöдьы дӥсен-кутэн, ӟеч бускелен, семьяен-ватагаен одӥг кылысь-ымысь, кылтэк-куаратэк, ӵош сиыса-юыса сётӥськом. Кияд-пыдад басьты, козма, Инмаре!» 

Озьыен, Первухин-этнографлы тау карыса, туннэ но кылӥськомы вашкала айы-мумыосмылэсь таӵе визьмо, дуно, сюлме пырись нясь-нясь удмурт кылын гожтэм малпанъёссэс но чакланъёссэс.

Авторез Волкова Л.А. – шаертодонъя музейын ужась
25.11.2022