Глазкар – Удмурт автономилэн шоркарез

Кунмылэсь 98 ар тырмэмзэ пусъйыса, нокызьы вунэтыны уг луы И.А. Наговицынэз. Сое буре вайыса но данъяса Глазкарын но улосвылами пöртэмесь ужрадъёс ортчизы ини. Соос радын ик тодамы ваёмы историысьтымы туж вакчи но со дыръя ик туж кулэлыко но тунсыко бамъёссэ. Мон верасько Удмурт автономилэн Глазкар шоркарез сярысь. Со вал 1921-тü арын, толшорысен инвожо толэзёзь.

И.А. Наговицын Удмурт автономилэн нырысетӥ тӧроез

Мар мугъёс меда вуттüзы Иосиф Наговицын кивалтэм улсын ужась Сарапулысь Удмурт комиссариатэз пичи гинэ городэ (ог 6 сюрс улüсез вылэм), палэнынгес сылüсь, вузкарон вылын радъяськись, кудзэ вашкала дырысен, Короленколэн кичöлтэмезъя «ненастоящий город» шуыса гинэ тодо вал, кадь?

Глазкар 1920-тӥ аръёсы

Тодамы ваеме: 1920-тü арлэн 4-тü шуркынмоназ Удмурт автономия сярысь Декрет потэм бере, Сарапулысь Удмурт Комиссариатлэн ужез эшшо но пачылмиз. Нырысь ик кылдытоно вал тöрлык, собере юнматоно, бускель улосъёсын огкыл шедьтыса, кунмылэсь границазэ. Туж но туж сюлэмшугъятüсь ужпум сылüз экономика удысын. Угось, Граждан ожлэсь бервылъёссэ тупатон секытэн мынüз. Заводъёс уг ужало, трос калык быремын войнае яке пегӟемын тöдьыосын. Кылемез жадемын, сютэм улэ, висёнъёсын черламын. Пумен калыклэн Совето властьлы осконэз ик быре ини. Токмазэ-а таӵе гожтэтъёс ыстылüзы кумъёс кумъёссылы, эшъёс эшъёссылы: «улон öраз уг пыры – люкето коммунистъёс», яке: «тöро юыса улэ, лушкемен нянь вуза, аслыз басьтэ тарантас, сапег но сüль». Соин ик нырысь радын кулэ вал калыкен огкыл шедьтыны. Валэктоно, марлы кулэ кунлык, ӝутоз-а со удмуртъёслэсь асваланзэс, сётоз-а эрик но шудо улон. Та учырын тупа вылэм пролетарской Ижкаре интыяськыны, яке Сарапулэ ик кыльыны. Ведь Сарапулын Комиссариатын 14 ужмуртъёсыз туж усто азьланьтüзы автономия кылдытон ужез. Вылаз ик одüг кылысь-ымысь, ог-огзэс валаса но ог-огзылы юрттыса татын тыршизы И. Наговицын но Т. Борисов. Та пумысь одüг учыр сярысь верасал. П.С. Елизаров тодэ ваёнъёсаз гожтэ: «Одüг пол мон партилэн уездысь комитетаз пумитай француз кылын вераськись кык интеллигентной воргоронъёсты. Со вал Удмурт комиссариатлэн комиссарез Наговицын но солэн юрттüсез Борисов».

Озьы ке но Удмурт автономия кылдытон улсын трос валантэмез вал коммунистъёслы но. Тани шуом, Сарапулысь ӟуч коммунистъёс-ужмуртъёс йöскалык политикаез öз лыдъялэ ӟечен но кулэен. Удмуртъёс, пе, огӥнын уг уло, кунлык асваланзы ӧвӧл, дышетскем калыксы ичи. Соин ик город уездлэн кӧняке люкетеныз автономиысь потüзы, куриськизы Пермь губерние. Ижкарысь коммунистъёслы но Комиссариат öз оскы. Борисовлэн верамезъя: «ижевцы – самостийники» (оло, 1918 арын калык бугыръяськонэз тодэ вайыса, оло Ижкар стрелковой дивизилэн Горд Армилы лек пумитъяськемез но тöдьыосын кошкемез сярысь малпаса). Наговицын таӵе кылъёсын валэктüз Иж посёлокез шоркаре быръйымтэзэс: «Ижын асьмеос öтьымтэ куноос луысалмы». Шоркарез Глазове выжтоно луиз.

Кин но со оло малпалоз, комиссар вордскем палъёсаз матэгес кариськиз шуыса. Угось ачиз И. Наговицын потэмын Глаз уездысь Туктым гуртысь (ӟуч сямен Омутница). Кылпумысь, именно потüз. Малы ке шуоно, 14 ар яратоно выжыосыз но родняез доры öз быгаты бертылыны революционер, большевик, комиссар. Нырысь Вятка губерниын (Вятка, Уржум), собере Уралын (Екатеринбург, Кыштым, Уфалей) большевистской подпольной ужен выременыз со тюрмаысь тюрмае но ссылкаысь ссылкае Красноярск, Енисейск, Иркутск губерниос пыр ортчиз 1913-тü арозь. Собере шуд усиз кунгож сьöры пегӟыны. Татын Бельгия, Франция, Англия, Швейцария пыр потоно луиз «Буйгасьтэм Петырлы» (Неугомонный Петр – И. Наговицынлэн партийной кушем нимыз). 1917 арын революция кылдэм бере, со анай-атайезлы ӝожомыса гожтüз вал тазьы: «Россие сярысь малпанэ Швейцариен берытскиз». Угось тюрьмаосын кутэм ты висёнэз нош гомӟиз, соин партийной эшъёсыз сое келязы санаторие йöнатскыны. 1919-тü арын толсуре гинэ вуиз коммунист И. Наговицын Россие – Москвае. Вот сыӵе кузь луиз дор палъёсаз бертыскемез.

Нош 1921-тü аре 5-тü толшоре ВЦИК гожтэ Декрет, кудüныз юнматэ Ревком – огдырлы гинэ кылдытэм тöрлык. Солэсь кулэ луись ужпумъёссэ верамы ини вал. Ревкомлэн тöроез луэ И. Наговицын. Юрттüсьёсыныз – Т.К. Борисовен, С.П. Барышниковен, Н.Ф. Шутовен, П.А. Стрелковен, И.И. Плотниковен соос лыкто Глазове.

Кыӵе со вылэм город? Верай ини, ог 6 сюрс улüсез пöлысь 1500 палаез гинэ ужа. Кар шымырскемын кадь сютэм улонлэсь, курадӟонлэсь, кезьытлэсь. Угось, тол со вакыт туж кезьыт вылэм, коркаос гинэ но бекмыльскылэмын, шуэ чекист Д.А. Глазов «Записки чекиста» тодэ ваёнъёсаз. Озьы ке но выль властез город пумитаз. Ревком интыяськиз М. Столбов купецлэн корказ.

Шоркар ревкомлэн юртэз

9-тü тулыспалэ ревком кенешаз кылдытüз ини нырысетü постановление. Соя 30,3 сюрс кв. километръем Удмурт автономной область люкиськиз Глазов, Ижевск но Можга уездлы. Отчы пыризы: Вятка губерниысь Глазов уездэзлэн 27 волостез, 14 – Елабуга уездысь, 12 – Малмыж но 18 – Сарапул уездысь. Вань улüсез лыдъяськиз – 691 сюрс адями (91,6 % – гуртын улüсьёс но, 8,4 % – карын улüсьёс). Национальной составезъя лыдъяськизы 54 % удмуртъёс, 42,2 %, зучьёс, нош бигер, бесермян, пор калыкъёс – 3,8 %. Туж тунсыко луиз автономилэсь кылдытонлы сüзем ужпумъёс. 27-тü тулыспалэ карын но уездъёсын ортчизы манифестациос, митингъёс. Глазкарын, шуом, 10 часын колоннаос потüзы транспарантъёсын, горд флагъёсын. Колонна ортчиз Преображенской собор урдэстü, мынüз Граждан ожын бырем но городын ватэм гордармеецъёслэн шайвылазы. Отын митинг ортчем бере калык люкаськиз дунтэк ортчытон спектакльёсы, кинофильмъёсы. Нош сизьым часын ӝытазе партийной но советской ужмуртъёс нош люкаськизы Народной доме, кытын кылзüзы Ленин но национальной политикалы сüзем докладъёс. Туж бадӟым саклык висъямын вал нылпиослы – коммунизме вамыштüсь егитъёслы. Ревкомлэн косэмезъя, роно соослы нимысьтыз висъяз сиён паек, мед гинэ манифестацие потозы, шуыса.

Шоркарын Удмурт автономилы сӥзем манифестация. 1921-тӥ ар, 27 толсур толэзь
Шоркарын Удмурт автономилы сӥзем манифестация. 1921-тӥ ар, 27 толсур толэзь
Дышетскисъёс шоркарын Удмурт автономилы сӥзем манифестациын. 1921-тӥ ар, 27 толсур толэзь

Ревком 15-тü тулыспалэ кылдытэ ужась ёзэтъёссэ, кудаз пырто на Глазов уездной исполкомысь ужмуртъёсты. Угось уг тырмо вал кивалтüсьёс, котькудüз кичöлтэм туж секытэн мынüз. Тани ӝöк-пукон, гожъяськон тüрлык но бумага гинэ но шуг вал шедьтыны. Гуртъёсын крестьянъёс ӝутскылüзы выт политика пумит. Вожпотэм, лекъяськем мылкыдын сутылüзы нянь кеносъёсты, тэльъёсты, чугун сюресъёсты. Апрель но май толэзьёсы ревком быгатüз буйгатыны ӟырдам калыкез, зüбломытüз гомась бугыръяськонэз. Наговицынлэн косонъёсызъя уже дунтэк мобилизовать карем воргоронъёсты лэзизы гуртъёсы, музъем ужъёссэс быдэсъяны. Озьы калыкез огдырлы буйгатӥзы.

Оглом вераса, июнь толэзёзь ревком быдэстüз азяз пуктэм бадӟым ужпумъёсты. Кылдытüз партийной но советской кадръёсты дасян школа. Ортчытüз нырысетü партийной конференция, кытын тöрое нырысьсэ быръемын вал удмурт воргорон – С.П. Барышников. Озьы ик шоркарын ортчиз нырысетü комсомольской съезд. Быгатüз сютэм улонэз вормыны. Тодады вайытüсько: 1921 но 1922-тü аръёсы Удмуртиысь калык Волга улосвылысь мукет калыкъёс музэн ик чидаз сютэм улонэз. Соку Наговицын вазиськиз вал государстволы юрттэт курыса. Туж беромыса вуиз со юрттэт. Трос калык быриз сютэм улыса. Но область ӧз сётскы курадӟонлы. Нош ачиз Наговицын ужаз жадёнэз но висёнэз валатэк, уйёссэ кӧлытэк, ваньзэ чидаз, оскиз – удмурт калыклы тазьы турттэмез юнме уз луы.

Июнь толэзе юан нош кылдüз дырлы юнматэм Ревкомез пыраклы воштыны Совето калык съездэн, но шоркарез Ижевске поттыны. Таяз учыре нокин пумит ӧз луы ини. Калыклы та ужрад валэктэмын вал тазьы: Ижкар – областьлэн шораз пуке, отын трос заводын ужась пролетариат (рабочий класс), отын трос коммунистъёс, отын ӟечгес но вӧлмытгес тӧрлык юртъерёс.